Կենսաբանության միջազգային օլիմպիադան (International Biology Olympiad) միություն է, որը կազմակերպում է կենսաբանության ամենահեղինակավոր համաշխարհային մրցույթը դպրոցականների համար` Կենսաբանության միջազգային օլիմպիադան (ԿՄՕ):
Մասնակիցներն ապագա գիտնականներ են բժշկության, գյուղատնտեսության, էկոլոգիայի և կենսաբանության բոլոր ոլորտներում:
Օլիմպիադան իրակացվում է 1990 թվականից և ներկայումս ունի 78 անդամ պետություն:
2008 թվականին Հայաստանը Կենսաբանության միջազգային օլիմպիադային մասնակցել է որպես դիտորդ երկիր, իսկ 2009 թվականին դարձել է լիիրավ անդամ:
2009 թվականից ի վեր ԿՄՕ-ին մասնակցել է հայ 35 աշակերտ:
2018 թ. Թեհրանում կայացած օլիմպիադայի ընթացքում Կենսաբանության միջազգային օլիմպիադայի ասոցիացիայի կողմից կայացվեց որոշում, որի համաձայն 2022 թ. հուլիսի 10-18-ը Կենսաբանության 33-րդ միջազգային օլիմպիադան կհյուրընկալի Հայաստանի Հանրապետությունը:
Ծրագիրը ֆինանսավորվում է Կրթության, գիտության, մշակույթի և սպորտի նախարարության կողմից: Ծրագրի համակարգումն իրականացնում է Երևանի պետական համալսարանը:
ԿՄՕ 2022-ի կարևոր բաղադրիչներից մեկն է կենսաինֆորմատիկան՝ միջմասնագիտական դաշտ, որը մշակում է կենսաբանական տվյալների ընկալման մեթոդներ և ծրագրային գործիքներ։ Ընդհանուր առմամբ, կենսաինֆորմատիկան կենսաբանական գիտության մեջ ինֆորմացիոն տեխնոլոգիաների կիրառումն է: Կենսաինֆորմատիկան կարևոր է ժամանակակից կենսաբանության և բժշկության մեջ տվյալների կառավարման համար: 2020 թվականի կորոնավիրուսային հիվանդության համաճարակը ցույց տվեց, որ տվյալների արագ վերլուծությունը և ուսումնասիրությունը շատ ավելի արդյունավետ է հիվանդության տարածումը կանխելու համար, երբ տվյալները տարածվում են արագ և հասանելի կերպով: